Sveinbjörn Markús Njálsson

Ég er búsettur í Hafnarfirði frá 1999, kvæntur Guðbjörgu Vésteinsdóttur aðstoðarleikskólastjóra og eigum við þrjú börn og tvö barnabörn.
Ég er menntaður grunnskólakennari frá Kennaraháskóla Íslands 1980. Hóf að loknu námi kennslu í Borgarnesi 1980. Fluttum heim að Hólum í Hjaltadal, Skagafirði 1982 og bjuggum þar til 1989. þar starfaði ég sem grunnskólakennari jafnframt því að hafa umsjón með skóræktarstarfi á staðnum. Starfaði sem aðstoðar-skólastjóri á Dalvík 1989 - 1997 og á Akureyri 1997 -1999. Starfa sem skólastjóri við Álftanesskóla á Álftanesi.
Ég hef tekið virkan þátt í félags- og stéttarfélagsmálum,
var m.a. í stjórn Verkalýðsfélagsins Harðar sunnan Skarðsheiðar og síðar í stjórnum svæðafélaga og fulltrúaráði Kennarasambands Íslands, verið formaður Ungmennasambands Skagafjarðar í fimm ár og formaður Alþýðubandalags Borgarness og nærsveita tvö ár.
Samhliða starfi hef ég skrifað fræðslurit um tré og runna í íslenskum skógum og kennsluefni um sama efni. Ég er félagi í Skógræktarfélagi Hafnarfjarðar. Skólamál hafa bæði verið starf mitt og áhugamál.

Í starfi mínu sem skólastjóri gefst tækifæri til að taka þátt í mótun og uppbyggingu skólasamfélags. Samskipti og samstarf mitt við starfssvið félags-, tómstunda- og íþróttamála sem og lögreglu hafa opnað nýjar leiðir til samþættingar og samspils þessara málaflokka og hvernig með samstilltu átaki er hægt að flytja fjöll.
Að fæðast og alast upp í sveit gerir hvern mann nær sjálfkrafa að einstaklingi sem ber virðingu fyrir náttúrunni og samspili manns og náttúru. Þannig hef ég bæði í starfi og leik verið og er ræktunarmaður.

Ég legg mikla áherslu á virka þátttöku í lýðræðisstarfi og umræðu. Uppeldi til ábyrgðar og uppbygging sjálfsaga er hverjum og einum mikilvæg í samfélagi nútímans og ekki síður framtíðarinnar. Lýðræðisleg umræða og siðferði í samskiptum milli manna og mannsins við náttúruna eru og verða mínar áherslur.